215. Jesuo Parolas

1. Infanoj, ho infanoj miaj!
Ĉu vi ne aŭdas min vokantan?
Ho, levu sin okuloj viaj!
Aŭskultu, aŭdu min plorantan.

2. Ja vane pacon vi sopiras,
Preĝante el la tuta mondo,
Se tamen ĉiu nur deziras,
Ke venka estu lia rondo.

3. Soldatoj, interbatalanta,
Murdante unu la alian,
Petegas, laŭte min vokante,
La helpon kaj la benon mian.

4. Kaj ĉiu kredas sin la prava,
Ĉar "sankta estas la afero" —
Proklamas la malvenkon sklava,
Semante pacon sur la tero!

5. Infanoj! viaj vortoj pikas
La koron mian sangadantan,
Kaj viaj preĝoj ne efikas:
Mi aŭdas preĝon nur amantan.

6. "Pardonu" estis mia vorto,
"Pardonu viajn malamikojn."
Nur amo estas vera forto:
Ĝi sola havas bonefikojn.

7. Pripensu, do, infanoj miaj!
Ĉesigu vian bataladon.
Min ne atingas vortoj viaj;
Mi ne aŭskultas malamadon.

8. Denove nun vi min krucumas,
Per akra glavo min tranĉante;
Ne miajn vortojn vi plenumas,
Kunhomojn tiel mortigante.

Text Information
First Line: Infanoj, ho infanoj miaj
Title: Jesuo Parolas
Original Language: Esperanto
Author: D. Matthews
Publication Date: 2009
Topic: Call to Pacifism
Source: HE 207
Language: Esperanto
Tune Information
Name: HEREFORD
Composer: Samuel Sebastian Wesley (1872)
Meter: 9.9.9.9



Media
MIDI file: Hereford
More media are available on the tune authority page.




Advertisements