باقدر يا غالي يا ربي يسوع

قرار:
باقدِّر يا غالي يا ربي يسوع
وقوفك معايا في وادي الدموع
باقدر وقوفك وسندة كفوفك
ونورك في ليلي وضيّ الشموع
باقدر يا غالي يا ربي يسوع

1- دا كام مره شفتك إله الأمانه
ما تقدرشي تنكر في نفسك خصال
لكن جوا قلبي معشش خيانه
وكان جوا فكري طموحي وآمال
فضلت تداري وشري تواري
مع اني في جهلي رفضتك كتير
لأنك حبيبي وحبك طبيبي
ما قلتش لقلبي ها ترجع كسير
وجاني كلامك وجاب لي سلامك
وجيت باعترف لك وباسكب دموع
باقدر يا غالي يا ربي يسوع

2- كتير كنت باعند واكسَّر كلامك
ما بافرقشي عن سائر المخلوقات
باحتم في رأيي واضيَّع سلامك
وآخرة إرادتي خساره وآهات
باحوش لنفسي واكوم لنفسي
ومش عارف اني باحوش نفايه
ولما وصلت لآخري في يأسي
صرخت يا ربي وقلت "كفايه
ما عدتش أسيبك هاتبِّت في إيدك
ويبقى مكانك دا جوا الضلوع"
باقدر يا غالي يا ربي يسوع

3- سنيني اللي فاتت مشيتها معايا
بتقنعني إنك أماني الوحيد
وبهجة خلاصك بتملا سمايا
وبتقول لي إنك معايا أكيد
بترحم غبائي شرودي وفراقي
وترجع تفكرني إنك معايا
بحبك تحاصر وإيدك تناصر
وصوتك يقول لي "أنا ليك حمايه"
وجيت بانحني لك وأقدَّر جميلك
واقول لك "حاوطني لآخر الربوع"
باقدر يا غالي يا ربي يسوع


Source: رنموا للرب #812