594. A solis ortus cardine

A SOLIS ortus cardine
adusque terrae limitem
Christum canamus Principem,
natum Maria Virgine.

Beatus auctor saeculi
servile corpus induit,
ut carne carnem liberans
non perderet quod condidit.

Clausae parentis viscera
caelestis intrat gratia;
venter puellae baiulat
secreta quae non noverat.

Domus pudici pectoris
templum repente fit Dei;
intacta nesciens virum
verbo concepit Filium.

Enixa est puerpera
quem Gabriel praedixerat,
quem matris alvo gestiens
clausus Ioannes senserat.

Feno iacere pertulit,
praesepe non abhorruit,
parvoque lacte pastus est
per quem nec ales esurit.

Gaudet chorus caelestium
et Angeli canunt Deum,
palamque fit pastoribus
Pastor, Creator omnium.

Iesu, tibi sit gloria,
qui natus es de Virgine,
cum Patre et almo Spiritu,
in sempiterna saecula. Amen.

Text Information
First Line: A solis ortus cardine
Title: A solis ortus cardine
Author: Cælius Sedulius
Publication Date: 2009
Topic: Christmas
Language: Latin
Tune Information
Name: CHRISTUM WIR SOLLEN LOBEN SCHON
Source: Rhythmic form of Gregorian chant, Geistliche Gesangbüchlein, Strasbourg 1525



Media
More media are available on the tune authority page.




Advertisements