Text: | A solis ortus cardine |
Author: | Cælius Sedulius |
Tune: | CHRISTUM WIR SOLLEN LOBEN SCHON |
1 A solis ortus cardine
adusque terrae limitem
Christum canamus Principem,
natum Maria Virgine.
2 Beatus auctor saeculi
servile corpus induit,
ut carne carnem liberans
non perderet quod condidit.
3 Clausae parentis viscera
caelestis intrat gratia;
venter puellae baiulat
secreta quae non noverat.
4 Domus pudici pectoris
templum repente fit Dei;
intacta nesciens virum
verbo concepit Filium.
5 Enixa est puerpera
quem Gabriel praedixerat,
quem matris alvo gestiens
clausus Ioannes senserat.
6 Feno iacere pertulit,
praesepe non abhorruit,
parvoque lacte pastus est
per quem nec ales esurit.
7 Gaudet chorus caelestium
et Angeli canunt Deum,
palamque fit pastoribus
Pastor, Creator omnium.
8 Iesu, tibi sit gloria,
qui natus es de Virgine,
cum Patre et almo Spiritu,
in sempiterna saecula. Amen.
Text Information | |
---|---|
First Line: | A solis ortus cardine |
Title: | A solis ortus cardine |
Author: | Cælius Sedulius |
Language: | Latin |
Topic: | Christmas |
Tune Information | |
---|---|
Name: | CHRISTUM WIR SOLLEN LOBEN SCHON |
Source: | Rhythmic form of Gregorian chant, Geistliche Gesangbüchlein, Strasbourg 1525 |